Бүген — Халыкара әби- бабайлар көне. Әйе- әйе, без ялгышмадык, Әби- бабайлар көне. Бу бәйрәм гаиләдәге иң өлкән кешеләргә багышланган һәм төрле буын кешеләрен, якыннарны берләштерергә ярдәм итә.
Үзәк китапханәнең татар әдәбияты бүлеге хезмәткәрләре инде үзләре дә берничә тапкыр әби- бабай булган, даими укучыларыбыз белән шушы бәйрәм хакында сөйләште. » Баланың баласы- балдан татлы», балаларыбызга биреп бетермәгән игътибар һәм назны оныкларыбызга бирергә тырышабыз. Балалардан, оныклардан һәрвакытта да яхшы хәбәрләр генә ишетергә язсын!»,- ди Фәнис абый. Көн дәвамында китап укучыларыбызны әлеге матур бәйрәм белән тәбрикләдек. Кечкенә укучыларыбыз Алмаз белән Айзилә әби- бабаларына үз куллары белән истәлекле бүләкләр дә ясадылар. Әлеге бәйрәм белән әби- бабайларны котлыйбыз. Алардагы җылылык, оныкларына карата ярату хисе, кайгыртучанлык безгә дә күчсен иде. Бүген генә түгел, гомумән, кадер- хөрмәткә лаек бит алар. Аларга сәламәтлек, озын гомер, беркайчан да боекмауларын телибез!
